ஆலய உற்சவங்கள்

ஆலயங்களில் இடம்பெறும் உற்சவங்கள் பொதுவாக நித்திய உற்சவங்கள், பட்ச உற்சவங்கள், வருட உற்சவங்கள், மகோற்சவங்கள் எனச் சிவாகமத்தில் வகுத்துக் கூறப்பட்டுள்ளது.

நித்திய உற்சவம்

காலை ஏழு மணிக்கும், மாலை ஏழு மணிக்கும் நடைபெறும் பூஜைகளைத் தொடர்ந்து, சுவாமியும் அம்பாளும் திருப்பல்லக்கின் மீது அமர்ந்து மங்கள வாத்தியம், சங்கு சேமக்கலம் முழங்க சிவனடியார் கூட்டம் புடைசூழ, திருமுறைப்பாராயணம் செய்து, ஓம் நமசிவாய என்ற பஞ்சாட்சர மந்திரத்தை அடியார்கள் உச்சரித்துக் கொண்டு ஆலயத்தின் உள்வீதியினை வலம் வருதல் நித்திய உற்சவமாகும்

பட்ச உற்சவம்

பிரதோஷ பூஜை உற்சவம் என்பது, பிரதோஷ காலத்தில் பட்ச உற்சவமாக நடைபெற்று வருகிறது. பிரதோஷ காலத்தில் பட்ச உற்சவமாக திருநந்திகேஸ்வரர், சிவன் அம்பாள் ஆகிய மூர்த்திகளுக்கு விசேஷ அபிஷேகங்கள் நிகழ்கின்றன. திருநந்திதேவருக்கு அருகம்புல் மாலை கரும்பு மாலை, திராட்சைப்பழ மாலை, பூமாலை என்பன சூட்டப் படுகின்றன.

வெள்ளியிலான இருபத்தியொரு மணிகளைக் கொண்ட மாலையும் அணியப்படுவது வழமையாகும். பிரதோஷ காலத்தில் ஸ்ரீ நடராஜப்பெருமான், அதிகார நந்திப் பெருமானின் இருகொம்புகளுக்கு இடையே திருநடனம் புரிகின்றார் எனக் கூறப்படுகிறது. அவ்வாறான கொம்புகளுக்கு நெற்றிப் பட்டத்துடன் கூடிய வெள்ளிக்கொம்பு பிரதோஷ காலத்தில், பிரதோஷ பூஜை வேளையில் திருநந்திதேவருக்கு முன் தேங்காய் உடைத்து இருபாதிகளும் நெய்விட்டு நெய் தீபம் ஏற்றி வழிபாடு செய்வது வழமையாகும்

அவ்வாறே சிவலிங்கத் திருமேனிக்கு மலர்மாலை, வில்வம் இலைமாலை சூட்டப்பட்டு அலங்காரம் செய்யப்படுகின்றது. அவ்வாறே அம்பாளுக்கும் மலர்மாலையையும், வில்வம் இலைமாலையையும் சூட்டி அலங்காரம் செய்யப்படுகிறது. பிரதோஷ காலத்தில் இவ்வாலயத்தில் முதலாவதாக திருநந்தி தேவருக்கு விசேஷ பூஜைகள் நடைபெறுகின்றன. இவ்வேளையில் நந்திகேஸ்வரருக்கு காப்பரிசி நைவேத்தியம் படைக்கப்படுகின்றது. இக்காப்பரிசி பூஜைகள் இனிதே நிறைவானதும், பிரசாதமாக அடியவர்களுக்கு விநியோகிக்கப்படுகின்றது.